تخصّص المدرسة الوطنية العليا للاتصالات وتكنولوجيا الإعلام والاتصال

نظام الدراسة ومدّتها

🔸 المدرسة تقرا بنظام 2+3 (مشي 3+2 كيما الليسانس/ماستر)، يعني نظام "مهندس دولة": يا تكمل 5 سنين دراسة، يا معندكش شهادة، ما تقدرش تحبس بعد 3 سنين.

🔸 هل تقدر تدير دكتوراه بشهادة مهندس؟ نعم، منذ 2024 صدر قانون رسمي وتطبق فعليًا، ومسابقات الدكتوراه تكتب "ماستر أو مهندس دولة أو مهندس معماري أو شهادة مطابقة".

🔸 هل الشهادة معترف بيها فالخارج؟ يختلف حسب البلد، فرنسا مثلاً تعترف بيها.

🔸 مهندس دولة أفضل من ماستر في نقاط الوظيف العمومي؟ نعم لكن بفارق بسيط جدًا (2 نقاط من 60)، وبعض الشركات تعطيه قيمة أكبر، لكن الفرق يبقى نسبي.

🔸 الطور التحضيري (سنتين): خليط بين ST وMI، التركيز على الرياضيات، الكهرباء (أساس التلكوم)، الفيزياء (ميكانيك، ظواهر ضوئية، كهرومغناطيسية)، وأساسيات الإعلام الآلي (برمجة وشبكات).

🔸 بعد العامين كاين كونكور كيما باقي المدارس العليا، وترتيبك يحدد مصيرك:

🌟 من الأوائل (~80%): يطلع مباشرة للتخصص

🌟 من الأواخر (~آخر 20%): فرصة أخيرة تسمى "الكونكور" (امتحان تنافسي مع طلبة آخرين حابين يدخلو بلاصتو)

🌟 اختيار تبديل المدرسة لمن يحب

🌟 من كان تحت الـ10: يعاود مباشرة (وعندك فرصة تعاود مرة فالسنتين الأولى ومرة فالثلاث سنين الأخرى)

🔸 الاسم "ens TIC" معناه: TI = Technologies de l'Information (الإنفورماتيك)، وC = Communication/Télécom (فرع من الهندسة الكهربائية). يعني المدرسة تجمع بين الإعلام الآلي والاتصالات.

🔸 3 سنوات التخصص: كامل الطلبة (بعد السنتين) يتوجهو لتخصص واحد يجمعهم: STR - Systèmes de Réseaux et de Télécommunication:

🌟 ST (Systèmes de Télécommunications): أساسها الكهربا اللي تقراها في السنتين الأولى

🌟 R (Réseaux): تخصص الشبكات (قريب من تخصص الإعلام الآلي)، والتعمق داخل الريزو (أمن سيبراني، كلاود، إلخ) يبقى على الطالب وحدو

🔸 مستوى الصعوبة: المحتوى صعيب لكن الأساتذة ما يديروش سوجيات صعاب بزاف، والجهد يمشي بشكل لوغاريتمي مشي خطي — تعب قليل يدي 11، تعب بزاف يدي 14، مشي 17 (عمومًا).

🔸 كاين تربصات ميدانية (Stage) كل عام ما عدا السنة الثالثة، في شركات كيما Mobilis، Algérie Télécom، وزيد Algérie Poste.

🔸 فرص لحضور أحداث (Events) كيما African Startup Conference وCTO وغيرها، تخليك تبني réseau مهني.

🔸 تعاقدات مع شركة Huawei وفرصة المشاركة في مسابقاتها التكنولوجية.

القبول والمعدّلات

المدرسة الوطنية العليا لتكنولوجيات الإعلام والاتصال والبريد العاصمة :
شعبتي رياضيات و تقني رياضي : 17,17

شعبة علوم تجريبية : 18,41

المدرسة الوطنية العليا للاتصالات وتكنولوجيات الإعلام والاتصال وهران :
شعبتي رياضيات و تقني رياضي : 16,69

شعبة علوم تجريبية : 17,57

احسب معدلك الموزون

المعدّلات مؤشّر من سنوات سابقة وتتغيّر كل سنة بحسب عدد الناجحين ورغباتهم — لا تعتبرها ضماناً.

أين تعمل بعد التخرّج

🔸 العمل ماش مضمون 100%، لكن أكثر من 70% من الخريجين يلقاو خدمة خاصة لي يزيد فورماصيون إضافية (Cisco, Huawei).

🔸 مجالات التوظيف:

شبكات الهواتف النقالة

Transmission

Fibre Optique

Radiocommunication

Développement

Sécurité Informatique

الذكاء الاصطناعي وتحليل البيانات

العمل الحر Freelance أو حتى شركات أجنبية

🔸 سوق الاتصالات في الجزائر يتطور والمجال واسع.

الخلاصة

📡 إذا تحب تدخل مجال الاتصالات، الشبكات، الأمن المعلوماتي، البرمجة، الذكاء الاصطناعي… هذ المدارس من بين أقوى الخيارات.

📈 الدراسة ماش سهلة لازم تحافظ على مستواك.

💪 التوظيف يعتمد على جهدك وحبك للتعلم.

المدارس المتوفرة في التخصص

🔹 أولًا لازم تفهم الفرق:

كاين زوج مدارس عليا رسميًا تحت وصاية وزارة البريد والمواصلات ووزارة التعليم العالي والبحث العلمي:

✅ المدرسة الوطنية العليا للاتصالات وتكنولوجيات الإعلام والاتصال وهران
(INTTIC Oran)

✅ المدرسة الوطنية العليا لتكنولوجيات الإعلام والاتصال والبريد العاصمة
(INTTIC Alger)

🔸 نفس المستوى: شهادة مهندس دولة في الاتصالات والشبكات والنظم الرقمية.

🔸 نفس النظام: كلاسيكي 5 سنين (ماش LMD).

الوضعية الرسمية

🔹 وهران: كانت معهد، اليوم تحولت مدرسة عليا وطنية بمرسوم رسمي.

🔹 العاصمة: كذلك صارت مدرسة عليا معترف بها وليست معهد LMD عادي.

🔹 عندهم نفس نمط الدراسة: جذع مشترك سنتين ثم تخصصات معمقة.

🔹 عدد المقاعد محدود: تقريبًا 80 إلى 100 مقعد كل عام.

🔹 الإقامة داخلية خاصة بالمدرسة (ذكور وإناث) + مرافق رياضية وصالات
انترنت ومصلى.

الشهادة

🔸 مهندس دولة في هندسة الاتصالات

🔸 المتفوقين يقدروا يواصلوا ماستر في نفس المدرسة أو يسجلوا في الجامعة.

شروط الالتحاق

🔹 شعبة: علوم تجريبية، رياضيات، تقني رياضي.

🔹 باك ≥ 14.

🔹 نقطة رياضيات ≥ 16 و فيزياء ≥ 16.

🔹 المعدل الموزون : (معدل الباك + رياضيات + فيزياء) ÷ 3.

🔹 الترتيب يتم حسب المقاعد المفتوحة والطلب.

🔹 حاليًا المدرسة تظهر في قائمة الرغبات الجامعية مباشرة (ما بقاش شرط
تسجل من موقع المدرسة كيما بكري).

🔹 العام الماضي معدلات القبول لحقو 17 لشعبتي رياضيات و تقني رياضي و 18 لشعبة علوم تجريبية

المعيشة والإقامة (مدرسة العاصمة)

🔹 الإقامة داخل المدرسة (ماتشقاش مع النقل)، نظيفة ومريحة مقارنة بإقامات أخرى

🔹 الإطعام مقبول نسبيًا (ماشي ديما، بصح مقبول)

🔹 ما كاينش مشاكل كبيرة في الماء عادةً (كان ظرف خاص عام واحد بسبب إصلاحات)

سلبيات لازم تعرفها (مدرسة العاصمة)

🔻 برنامج قراية مضغوط ومُجهِد

🔻 تقرا شوية من كل حاجة (مشي تخصص دقيق فقط) — فيها جانب مليح وجانب سلبي

🔻 ما عندكش وقت كبير لحاجات خارج القراية

🔻 الحضور إجباري من الأحد للخميس، من 8:30 حتى 16:15 تقريبًا، والبرنامج معمر

🔻 كامل الأساتذة ماشي بنفس المستوى، وأحيانًا تلقى روحك محتاج تفهم وحدك أكثر

🔻 حرية محدودة في الإضرابات والانخراط في النقابات الطلابية

🔻 الإدارة نوعًا ما ضعيفة (واقع في أغلب المدارس العليا)

🔻 المجتمع صغير (~250 طالب)، وحسب بعض المنشورات والتعليقات قد يكون الجو مسموم لبعض الطلبة

توضيح من طالب في المدرسة (منقول)

"هذي تجربتي الخاصة، وكل واحد وتجربتو. القراية مشي صعيبة بزاف مقارنة ببعض المدارس العليا، يعني إذا تقرا وتخدم على روحك تقدر تجيب مليح وماشي لازم تتعذب باش تطلع العام. الديبلوم مليح وفرص العمل تكون أكبر خاصة إذا تطور روحك مليح.

وننصحكم قبل ما تختارو: استخيرو ربي 🤍، ما تتأثروش بالتعليقات السلبية ولا الإيجابية اللي ما تكونش موضوعية. الجامعات في الجزائر ماشي perfect، ماشي حياة وردية بلا مشاكل، وماشي سيئة لدرجة كبيرة... هي سيئة وصعيبة بصح محتملة. إذا كنت مستعد وتقدر تصبر على لحوايج هاذو... مرحبا بيك 🤍، وإذا لا، كاين خيارات أخرى يمكن تناسبك أكثر."

نظام "مهندس" بكلمات بسيطة (توضيح من طالب آخر)

"تقري بنظام 2+3 مشي بنظام 3+2، معناها نظام مهندس مشي 3 سنوات ليسانس ثم عامين ماستر. نظام مهندس معناه يا تكمل 5 سنوات دراسة يا معندكش شهادة، ما تقدرش تحبس بعد 3 سنوات. بعد 5 سنوات تعطيك شهادة "مهندس دولة" وماتعطيكش ماستر.

منذ 2024 صدر قانون رسمي يخليك تقدر تدير دكتوراه بيها، ومسابقات الدكتوراه تكتب "ماستر او مهندس دولة او مهندس معماري او شهادة مطابقة". هل تقدر تروح لأي بلاد بيها؟ لا، كاين بلدان تقدر وكاين لا، فرنسا تقدر مثلاً. هل مهندس دولة أفضل من ماستر في الجزائر؟ نعم لكن بتأثير صغير جدًا (2 نقاط من 60 في تنقيط الوظيف العمومي)، وبعض الشركات تعطيها شأنًا أكبر، لكنها تبقى حاجة نسبية.

العامين الأولى (طور تحضيري) والثلاث سنوات الأخرى (طور التخصص)، وبينهم 4 احتمالات حسب الترتيب: تطلع مباشرة إذا كنت من الأوائل، أو كونكور إذا كنت من الأواخر، أو تبديل مدرسة، أو معاودة إذا كنت تحت الـ10.

العامين الأولى تقرا فيهم الرياضيات، الكهرباء، الفيزياء، وأساسيات الإعلام الآلي. بعدها كامل الطلبة يتوجهو لتخصص واحد: STR (Systèmes de télécommunications + Réseaux)."

ملاحظات مهمة

🔹 المنافسة كبيرة، الترتيب يلعب دور كبير.

🔹 الطالب لازم يخدم على روحو: لغات (فرنسية + إنجليزية) ضرورية.

🔹 المدرسة ماش متعاقدة رسميًا مع شركات التوظيف يعني تخدم بروحك و شطارتك.

🔹 بعض المهن الميدانية صعبة على البنات لكن المجالات التقنية الإدارية
تناسبهم جدًا.

الإقامة

🔹 الإقامة داخلية مجهزة مقارنة بباقي الإقامات الجامعية: أكل مقبول، صالات انترنت ورياضة، أمن، ملعب كرة قدم ومصلى.

(صراحة تحسها فندق و تلقاو صورتها في أول تعليق)

الفرق مع معهد البريد INPTIC؟

🔸 INTTIC Oran & INTTIC Alger = مدارس عليا، كلاسيكي، شهادة مهندس دولة.

🔸 INPTIC = معهد LMD: ليسانس (3 سنين) + ماستر (سنتين). نفس المجال لكن مش
مدرسة عليا ولا شهادة مهندس.

🔸 INPTIC يشترط تسجيل مسبق في جامعة ثم تقدم ملف تحويل وانتقاء على أساس
المعدل الموزون.

تسجيلات 2026

🔹 المدارس العليا للاتصالات أصبحت تظهر مباشرة ضمن الرغبات الجامعية كيما
باقي المدارس العليا التقنية.

🔹 ما بقاش التسجيل من موقع المدرسة.

🔹 بعض الحالات يقدرو يدخلوك بعد عامين دراسة علوم وتكنولوجيا ST ثم
concours وطني للالتحاق بالسنة 3.